4. April 2014

Heit hab i um halb 7 angfangan zum Arbeiten und hab die Zoe dann bis halb 9 kabt. Sie hat dann eh gfrühgstückt und dann hab i ihra für die Schule fertig gmacht. Kurz vor halb 9 samma dann eh losgfahrn und dann hab i ihra abgliefert und als i dann wieder daheim war hab i mir a Joghurt mit Müsli gmacht und dann hab i Let’s Dance, also die Folge von letzter Woche im Intenet angschaut. 😉

De 3 Stunden am Vormittag san dann so schnell vergangan und dann wars eh scho wieda an da Zeit die Zoe von da Schule abzuholn. 🙂 Bin dann no zur Bank gfahrn Geld abheben und dann heim. I hab da Zoe dann was zum Essen aufgwärmt und i hab mir wieda an Obstsalat gmacht und dann um halb 2 hab i dann mit da Nessi, Mum & Dad geskyped. 🙂 Zoe hat dawal wieder brav gspielt und als i dann fertig war warma draußen in da Einfahrt a bissal radl fahrn. 🙂

Dann hamma eh no herinnan gspielt bis da Todd um 5 heimkomman is. I hab mi dann fertig gmacht, wal mi die Alex dann agholt hat um kurz nach 6, wal wir es Wochenende in an Cottage bam Mount Sunapee verbracht haben. Des kert irgendwen von ihrer Gastfamilie und wird awa net wirklich benutzt und des war dann perfekt für uns. 😀

Wir warn dann davor no Sachen fürs Frühstück kaufen und Chips und dann aufn Weg zum Cottage samma dann ba an Restaurant stehen blieben und haben Abendgessen. Des Restaurant hat sich als so guad ausagstellt, dass wir glei für morgen Abend dann dort an Tisch reserviert haben, wal so viel Auswahl an Restaurants gibt’s da net. 😉 Des war so a italienischen & amerikanisches Restaurant! 😀

Danach samma dann zu dem Cottage gfahrn und des Navi hat uns eben net dahin bracht, des hamma eh scho vorher gwusst, dass as de Adresse net findent und die Alex hat alles aufzeichent kabt awa dann samma amal zu fruah abbogen (hamma awa erst später gmerkt) und dann samma mitn im Wald gstandn also stehen blieben wal wir kann Plan kabt haben wohin und es hat aus Strömen gregnet und dunkel wars und i dann nur so zur Alex sperr es Auto von innen zu und sie dann so hoffentlich springt kana ausn Wald und klopft ans Fenster!

Also des wor echt Horrorfilm mäßig he! 😀 Im Cottage samma dann awa doch ankomman und des war echt herzig und wir habens uns dann da gmütlich gmacht und dann haben wir angfangan unser Scrapbook zmachen und da samma dann bis nach Mitternacht dran gsessn bis wir gsagt haben, dass wir schlafen gehen. 😉

3. April 2014

Hab heute ab 7 auf die Zoe aufpassen müssen und nachdem i da Zoe was zum Frühstücken geben hab, hab i mi dann auf die Couch gflaggt. ;D

Irgendwann später hab i mir dann a 2 Spiegeleier gmacht und de mit frischausabackene Weckerl gfuttert und die Zoe hat am Vormittag dann eh schen gspielt und sich zum Glück a bissal alleine ah beschäftigt. 🙂 Um 10 samma dann eh zur Bücherei gfahrn und warn dort wieder bis 12 und angeblich soll heite die eine Mutter was scho 4 Kinder im Alter von 1-4 hat ihr 5tes Kind kriegt haben. 😉 Die Leit ham dann eh alle a bissal tratscht in da Bücherei und gmeint, dass de wahrscheinlich nie aufhern Kinder zum Kriegen und so weiter. 😉

Wir warn dann danach no einkaufen und dann samma heimgfahrn. 🙂 Nachdem i die Zoe mit Mittagessen versorgt hab und i mir a was gmacht hab hab i dann kurz nach 1 mit da Naomi geskyped, wal ihra is net so guad gangan awa nächsten Freitag kommt sie mi ja eh besuchen. 🙂 Wir haben dann fast a Stunde geskyped und danach war i mit da Zoe eh no draußen bis es an da Zeit war es Abendessen zu kochen! I hab Polenta mit Tomatensauce machen miasn und hab zuerst mal kan Plan kabt wie i des machen soll, wal i no nie Polenta selber gmacht hab und es hat keine „Soft Polenta“ geben beim einkaufen und deswegen hab i dann den normalen nehman miasn und hab dann eben gegooglt was i machen muss und im Endefekt hab i den eh nur kochen müssen. 🙂

Um 5 is da Todd dann heimkomman und um halb 6 hamma dann Abendgessen. 🙂 Sid hat wieder Nachtschicht kabt heite und nachn Abendessen hab i dann auf meim Laptop a bissal ferngschaut, sodass i ganz vergessen hab mein Blog zum Schreiben! 😉 haha 😀

Ja mehr hab i dann eh net mehr wirklich gmacht außer dass i duschen war und dann im Bett glegen bin und a bissal im Internet gsüchtelt hab. 🙂

2. April 2014

Heute hab i wieder frei kabt und dann endlich mal ausgschlafn also bis 10 herum circa. 🙂 I hätt a no länger schlafen kennan awa dann hab i auf die Uhr gschaut und hab gsehn, dass as eben scho so spät war und dann bin i auf, wal i mit da Mama ausgmacht hab, dass wir skypen und dann wollt i sie net länger warten lassen, wal i hätt sonst wahrscheinlich no Ewigkeiten weiter schlafen kennan. 😀

Irgendwann zwischendurch hab i mir dann mal was zum Essen geholt und dann hamma eh weitergeskyped. 🙂 Um 12 herum bin i mi dann duschen gangan und fertig machen und als i dann fertig war denk i mir so, was i da so laut und dann warn 2 Freunde von da Zoe da und deren ihre Mama und se haben im Wohnzimmer alle zamman gspielt kabt. 🙂

I bin dann um kurz nach 1 zur Alex runter gfahrn und davor war i no schnell bei da Post, Tankstelle und i hab dann in Hooksett meine Fotos abgholt de i gestern online hochgladet hab. 🙂 Hab 151 Fotos für 15 Dollar kriegt und des is ziemlich cool . 🙂

Dann hab i so an Hunger kabt, dass i no schnell zum Supermarkt zuwi gfahrn bin um mir a Weckerl zu kaufen. Des hab i dann ba da Alex gessen und wir haben dann mit die Kids herumgspielt und tratscht bis wir dann entschlossen haben, dass wir zum Spielplatz gehen wals so schen is. 🙂 Die Schwester von ihrer Hostmum hat dann no ihr Kind bei uns abgliefert und dann hat er der sich quasi um die Kids kümmert und wir haben nur mehr es Baby kabt. 🙂 Wir warn dort bis halb 6 oda so und dann samma eh zruck zum Haus gangan und haben dann dort Abendgessen. 🙂

Am späten Abend samma dann no zu da Cousine von Alex ihrer Hostmum gangan, wal wir den Schlüssel fürs Cottage braucht haben wo wir am Wochenende sein werden. Dort hamma dann getratscht und warn dann bis halb 10 dort und es war voll die Gaude. 🙂

Wir san dann no zruck zur Alex spaziert, wal sie eben nur eine Straße weiter wohnt und i hab da Alex dann die Seite zeigt wo ma die Fotos hochladet damit sie des dann no machen hat kennan. 🙂 I bin nach dem dann eh heimgfahrn und war dann kurz nach 10 daheim und hab mi dann eh glei bettfertig gmacht. 😀

1. April 2014

Endlich! Der Frühling is da! 😀 😀

Hab um 8 anfangan müssen zum Arbeiten und war dann no voll miad, wal i echt Schlafmangel hab he! Bis halb 10 hamma eh net wirklich viel gmacht außer uns fertig gmacht und die Zoe wieder fürs tanzen anzogn. 😉 Dann samma eh dort hin gfahrn und dann hat sie tanzt bis 11 und i hab wieder dort gwartet und dann hab i eh mit einer Mama gredet und dann hat sie mi eben voll ausgfragt wieder und ja sie war echt voll liab. 🙂

Daheim hat sich die Zoe dann eh zuerst umzogn und dann hab i für mi wieder an Obstsalat gmacht und da Zoe wieda was zum Essen gmacht. Als wir gessn haben bin i dann schnell meine Haare waschen gangan, wal des war echt dringend nötig. 🙂 Hab extra a Haube aufgsetzt kabt am Vormittag haha 🙂 Dabei wars heite es erste Mal richtig warm. 😀

Dann hamma no a paar Fotos gmacht und um dreiviertl 1 samma dann wieder zur Bücherei gfahrn zur Story Time. 😀 Des war eh wieda voll cool und da Zoe hats auch voll gfalln und sie hat ihren Spaß kabt. 😀 Bis 3 warma dort und wals eben so schen wor samma donn zu Fuß no zur Post dort gangan ane Briefmarken kaufen und dann wieda zruck zum Auto. So um kurz vor 4 warma dann daheim und i hab dann angfangan die Küche aufzuräumen und die Zoe is dawal draußen a bissal Radl gfohrn in da Einfohrt und i hob donn no a riesen Schüssel Obstsalat machen müssen, wal die Sid des aufgschriebn hot fia heite. Hot eh Ewigkeiten dauat des zum Schneiden und die Zoe hat dann no ihr Schneehose anzogn und hinten im Garten umadumgmurzt. 😉

Als sie dann eina is hamma dann die Wäsche gmacht und ihr Bett überzogen, wal sie hat wieder mal ins Bett gludlt kabt und dann is um 5 die Sid heimkomman und hat dann Schweinefilet gmacht und da warn genau 4 Stücke, also für jeden eines und de warn awa so klan und die Hälfte davon warn Knochen und Beilage hat sie ah kane dazu gmacht und i hab dann Brot dazu gessn. 🙂 I hab dann awa no so an Hunger kabt und wollt dann awa net glei zum Kühlschrank gehen, wal des warat a irgendwie bled kumman und als sie mit da Zoe donn ausi is die Chicken eini zum duan hob i ma schnö a fette Schüssel mit Cornflakes und Milk gholt. 😀

I hab dann auf Facebook a Angebot gsehn, dass ma irgendwo Fotos ausdrucken kann und eines kostet 10c und da i eh endlich mit meim Scrapbook anfangan muas hob i de donn olle ba dera Homepage aufiglodet und i hob donn insgesomt 151 Fotos kobt für 15 Dollar und des is echt gor nix. 😀 Und donn is gstondn, dass i de morgen scho obhuln kumman kau. 😉

Danoch bin i donn um 11 herum eh schlofn gongan. 🙂

31. März 2014

Also der Flug war da reinste Horror he! Es war eiskalt und überhaupt ka Platz und wir haben zwar Decken kriegt awa de hat a nix gholfn. I bin in da Mitte von die 3 Sitze gsessn und die am Fenster is a Schwarze gsessn und i was no, dass sie sich irgendwann auf mei Schulter glegt hat und dann hab i mei Schulter eben so a bissal gschüttelt, damit sie ihrn Kopf weggibt. 😉 Gschlafn hamma gar nix und dann samma um 5 in da Früh in Boston glandet! 🙂

Wir san dann eh glei zum Auto und dann Richtung Norden gfahrn. Es hat voll gschüttet und keine Ahnung was de Leit scho wieda aufgfiat hobn awa 4 Autos san im Graben glegen und überall war die Polizeit he! Um kurz vor 7 warma dann ba da Alex und sie is dann ausgstiegen und i bin dann zu mir heim gfahrn und war um ca. halb 8 daheim. I bin dann reingangan und die Sid dann so es erste was sie gsagt hat: Schule is abgsagt und du musst um halb 9 anfangan anstatt um halb 12 also weder Guten Morgen no sunst irgendwos oda ob da Flug guad wor nix. I hab dann gsagt okay und bin rauf in mei Zimmer gangan, wal i seit über 24 Stunden munter war und hab mi dann ins Bett glegt, damit i dann wenigstens a Stunde schlafen kann und dann hat sie angfangan in da Küche unten mit die Töpfe zum klempan und wos was i he! I hob donn eh net schlofn kennan und um holb 9 bin i donn owi gongan uns sie wor donn eh scho weg und donn er so hoffentlich bist net zu müde und er findests quasi voll witzig, dass Ende März nomol die Schule obgsogt wird he. I hob gedocht i zuck aus he!

Als er weg wor hob i mi donn auf die Couch glegt und bin bis halb 1 net aufgstandn von da und bin alle 10 Minuten eingschlafn und die Zoe hat eben am Wohnzimmerboden gspielt und war echt brav also zum Glück he, wal i hob kane Nerven kobt ihra zum Beschäftigen he!

Am Nochmittog hob i donn amol wos gessn und mi aunzogn und donn hob i awa no einkaufn fohrn miasn, wal i jo Abendessen hob kochen miasn und des homma donn eben schnell gmocht und des wor so a Nudelauflauf und die Sid is dann um 5 heimkomman und dann bin i rauf gangan duschen und hab mi ins Bett glegt. Hab dann a bissal DSDS angschaut, wal i net um 5 glei schlafn gehen wollt und dann bin i im Endefekt um halb 9 liegen gangan und hab awa dann net einschlafen kennan! Keine Ahnung ob i zu übermüdet war oda wegen den 3 Stunden Zeitunterschied…i war dann um genau zu sein bis 12 auf, wal i immer wieder auf die Uhr gschaut hab, wal i ma gedacht, hab dass as des net gibt he. 😉

Las Vegas! :)

Freitag, 28. März 2014:

I bin um halb 7 aufgstandn und hab dann die Zoe fertig für die Schule gmacht und dann hab i ihra um halb 9 dort abgsetzt. 😉 Dann bin i eh wieder heim gfahrn und hab no meine restlichen Sachen einpackt und war dann no duschen. 🙂 Die Nachbarin war heute wieda da unser Haus putzen und dann hab i eh wieda mit ihr tratscht und ihr erzählt, dass i eben nach Las Vegas flieg fürs Wochenende! 😀

Um halb 12 bin i dann zur Alex runter gfahrn und die Zoe is von ihrer Oma von da Schule abgeholt gwordn. Nach 12 war i dann eh ba da Alex und sie hat dann no ihren Koffer fertig packt und so gegen 1 hamma uns dann aufn Weg nach Boston gmacht. Zuerst samma dann no tanken gfahrn, also i bin nach Boston gfahrn und wir haben uns dann den Benzin aufteilt. 😉

Am Flughafen samma dann eh glei durch Sicherheitscheck gangan, wal wir haben uns ba ihr scho online eincheckt kabt. 🙂 Des is eh alles super schnell gangan und hinkaut hat ah alles und die Alex hat dann am Flughafen no was zu Abend gessen bevor wir abgehoben san nach Detroit zu unserer Zwischenlandung. 😀

I hab dann aTablette gnomman, damit mir net schlecht wird bam Fliegen und de hat nach Detroit sogar gwirkt. Dort hamma dann 45 min Zeit kabt unseren Gate zu wechseln und haben uns dann no von dort an Schlüsselanhänger kauft. 😀 Dann is sichs no ausgangan, dass ma kurz Internet süchteln und dann hab i eh scho wieda die nächste Tablette gnomman und wir san ins Flugzeug nach Vegas eingstiegen. 😉

Auf dem Flug is ma leider schlecht gwordn, awa zum Glück net so vü. 😉 Um halb 10 samma dann glandet und kaum raus ausn Flugzeug san dort scho überall die Automaten gstandn und alles hat blinkt haha. 🙂 Wir haben dann den Shuttle vom Hotel angrufen und der war 15 min später da und 5 min später warma dann im Hotel, haben eincheckt und an Brief kriegt wann wir morgen aufstehen müssen.

Es Zimmer war voll schen und es Bett riesig he. Da hätten locker 4 Personen in dem Zimmer schlafen kennan awa so hamma beide unserer eigenes riesiges Bett kabt. 😀 Wir haben uns dann no schnell duscht und san dann schlafn gangan, wal es warn dort umi 3 Stunden Zeitunterschied, also für uns scho mitten in da Nacht. 😀

 

Samstag, 29. März 2014:

Wir san um 7 aufgstandn und haben uns dann fertig gmacht und san dann runter in die Lobby gangan und dort hamma dann alle anderen Au Pairs kennenglernt. Wir warn insgesamt 53 und 3 davon waren Typen. 🙂 Die meisten Au Pairs san eh wieder amal aus Deitschlond kumman. 😉

Dann samma alle zamman Frühstücken gangan und wir haben 20 min aufn unseren Tisch warten müssen und dann hamma es Essen um 8:10 kriegt und um 8:20 hat da Kurs angfangan awa de warn so easy drauf, dass se gsagt haben, dass wir in Ruhe frühstücken sollen alle, wal wir haben nämli alle scho voll eini gstopft kabt he. 🙂 Dann samma zum Kurs und des war alles so locker uns echt lustig he. 😀 Wir haben 6 verschiedene „Lehrer“ kabt und des war die volle Gaude. Also wir haben hauptsächlich Spiele gspielt und über lustige Sachen gredet. 🙂

Mittagessen hamma dann am Pool vom Hotel kabt und da hats eben Sandwiche geben und so Karotten und Gurken mit Dip und Kuchen und Wasser. Also satt samma gwordn. Es Wetter war a voll schen also heite hamma 26 Grad kabt und es war voll schwül he. Am Montag hamma ja no -15 Grad kabt und jz des he. Echt oag 😀

Bis 5 hamma Kurs kabt und wir haben uns am Vormittag für die Limosinenfahrt am Abend angmeldet. 🙂 De dauat 2  Stunden und kostet 20 Dollar. 🙂

Nachn Kurs samma dann mit andere Au Pairs Bier trinken und Pizza essen gangan und wir haben Bier kriegt obwohl wir no kane 21 warn awa es hat kana gfragt also Pech kabt. 🙂 Dort samma dann fast 1 1/2 Stunden gsessn und haben tratscht und dann samma eh zruck aufs Zimmer uns duschen gangan und fertig gmacht fürn Abend. 🙂

Um 7:45 samma von da Limousine abkolt gwordn und dann samma als erstes zu dem Las Vegas Schild da gfahrn und dann eben durch die Stadt zum „ursprünglichen“ Las Vegas und da war die Hölle los. Nach 2 Stunden war die Fahrt dann vorbei und de 2 Stunden san scho schnell vergangan he!

Danach warma dann no in da Stadt und haben eben alles angschaut und überall war alles voll beleuchtet und gwurdelt hats he. Um 12 warma dann im Hotel und san dann schlafen gangan. 😀

 

Sonntag, 30. März 2014:

Nach einer echt kurzen Nacht samma dann um kurz vor 8 vom Wecker munter gwordn und haben und dann glei fertig gmacht und unsern Koffer halbwegs packt und dann samma eh zum Kurs ohne zu frühstücken vorher, wal wir net exrta a Stunde früher aufstehen wollten deswegen. 🙂 Im Kurs dann ham eh alle voll fertig ausgschaut und dann hams uns gfragt wer eben gfrühstückt hat und es haben a paar auszagt und dann hams gsagt, dass wir zur Tankstelle rüber gehen sollen um uns was zu Essen zu kaufen. 😀 De warn so lässig he und ah Ende 20 und 30 und da Kursleiter wär eigentlich schon in Pension awa wal er was zu tun haben will macht er des und deswegen is des total cool gwesen he. 🙂

Danach hamma dann eigentlich eh nur mehr darüber gsprochen, welche Städte es wert san hinzureisen und was wir sonst no für Kurse belegen können und dann die Reisen fürs Reisemonat also echt cool. 😀 Zum Schluss hamma se dann no a Feedback geben und dann warma um 11 fertig statt um 12 also es war soo genial des kann ma gar net beschreiben. 😀

Wir haben dann unsere Sachen ausn Zimmer geholt und uns umzogen und dann samma runter gangan auschecken und haben unsere Koffer im Kofferraum abgstellt, wal unser Flieger erst um halb 10 am Abend gangan is und wir am Nachmittag dann no mit 2 anderen Vegas bei Tag angschaut haben. 😀

Im Endefekt san wir bis 6 durch ganz Vegas gangan und haben überall Fotos gmacht und Souvenirs kauft. 🙂 Beim Mci warma Mittagessen und am Nachmittag samma dann nomal hingangan uns a Eis kaufen. 🙂 Bei Tag is Las Vegas a so richtig cool und schön und wir haben echt die volle Gaude kabt he. 🙂 Des war bis jetzt eines meiner besten Wochenenden hier in da USA! 😀

Des muas ma afoch selbst erleben, wal sonst kann ma des gar net wirklich alles glauben. 😀

Um 6 warma dann im Hotel und haben uns dann was gmütliches anzogn fürs Fliegen und um halb 7 samma dann vom Shuttle abgeholt gwordn und 5 min später warma am Flughafen. 😀 Dort wars voll ruhig he awa angenehm bis uns dann kalt gwordn is vom warten. 😉

Indn Flieger samma dann um 9 eingstiegen und dann samma ganze 4:15 Stunden zruck nach New Hampshire gflogn! Details gibt’s dann bald!

Fotos san ah scho online zum Anschaun. 😀 Viel Spaß Leute! 🙂 ❤

27. März 2014

Heite scho wieda um holb 7 aufstehen miasn! Eindeutig zu früh. 😉

Wir haben uns dann auf die Couch glegt oda besser gsagt i, wal um holb 7 geh i mit da Zoe no nix spieln. Hob donn amol Facebook und Olles checkt so wie jeden Morgen und als i donn einigermaßen munter wor um dreiviertl 9 hob i mir donn a weichkochtes Ei gmocht und amol gmütlich gfrühstückt. 😀

Da Zoe hob i donn a Bad einlossn und donn is sie so eh amol a Zeital drinnan gwesen und donn hob i no ihre Haare gwaschen und de dann gföhnt und amol gscheit durchfrisiert. 🙂 I hob mi donn a fertig gmocht und um viertl 11 samma dann zur Bücherei gfohrn. 🙂 Dort warma wieder bis 12 und de ane was ihr 5tes Kind erwartet und die andern 4 Kinder alle im Alter von 1-4 san hat angeblich nächste Woche Geburtstermin. 😉

Um 12 hat die Bücherei dann eh zugsperrt und wal die Sonne so schen gschienan hot samma dann a bissal durch Ort gongan und worn ba da Bank, wal i Bargeld für Las Vegas braucht hob und donn no ba da Post. So gegen halb 2 warma dann daheim und haben was gessen und dann hab i zur Zoe gsagt, dass sie mal in ihr Zimmer gehen soll und a bissal ausrasten und dann hats gleitet und dann san 2 so Typen komman de unsere Regenrinnen austauscht hobn, wal de Dachdecker de angeblich im Herbst hingmocht hoben – keine Ahnung i hob net amol gwusst, dass de komman. 😉

Die Zoe hot donn eh de a Weile zuagschaut und i war dann nebensächlich (war mir a ganz recht)! ;D Wir haben dann a bissal gezeichnet und Puzzle baut und dann hab i angfangan de Suppe zum Machen, wo mir die Sid a Rezept geben hat und dann hätt sie eigentlich um halb 5 daheim sein sollen awa im Endefekt war sie um 5 daheim also scho wieda mal a halbe Stunde zu spät.

Sie hat dann mit da Zoe um 5 Abendgessen awa des war mir zu früh, also mir is jo holb 6 scho zu fruah awa um 5 geh i net Abendessen he. 😉 I hab dann meine 2 Berge voller Wäsche bügelt und dann no mein Koffer gepackt und dann wars eh 7. Die Zoe war dann eh scho im Bett und i bin mi dann duschen gangan und hab mir dann was zum Essen gholt. 🙂

Todd hot heite wieder Abendklinik kobt und is donn um 9 hamkumman. I hob donn wieder a bissal fergschaut bevor i schlafen gangan bin. 🙂

26. März 2014

FREI FREI FREI!! 😀

Und schon wieda ausschlafen. 🙂 Also eigentlich net wirklich, wal i hab so richtig scheiße gschlafn de Nacht und dann in da Früh als as so richtig gemütlich war bin i wieda amal munter gworden, wal se wieder in da Küche Lärm gmocht hoben bis se die Zoe donn um holb 9 in die Schul brocht hoben. Wal mir des awa zu Früh wor hob i donn nomol probiert einzuschlafen awa hat net funktioniert und dann bin i afoch no nochglegen bis dreiviertl 10. 😉

I bin dann owi gongan mir a Müsli huln und donn hob i eh mit da Mama geskyped für über 2 Stunden. 😀 Danoch wor i donn duschen und mittlerweile worn se eh ah scho wieda ausn Haus, wals die Zoe von da Schule abkolt haben und dann ins Kino gfahrn san. 🙂 Hab dann mein Laptop mit ins Bad gnomman und dann Kronehit eingschalten im Internet und Ewigkeiten geduscht. 😀

Um halb 2 bin i dann zur Alex runter gfahrn und wir habens uns dann auf da Couch gemütlich gmacht kabt, als as gleitet hot und der Typ kumman is der was da Alex ihr Windschutzscheibe austauscht hat, wal sie gsprungan is. 😉 Der war sowieso da geilste he! Hat die Alex voll angflirtet! 😀 Wir san dann draufkomman, dass er Italiener war awa der war 30 oda so.. 😉

I hab dann eh wieder es Baby ghalten und um 5 war die Alex fertig mit arbeiten und ihr Gastpapa is hamkomman und sie hat dann eigentlich Spaghetti machen wollen, wal ihr Mama hat ihra da von Knorr voll viele Sackerl mitgnomman kabt awa se haben dann kane Spaghettinudeln kabt und dann hamma an Nudelauflauf gmacht also mitn Faschierten. 🙂 Des wor sooooo guad he. 😀 Endlich mol wieda wos gscheits zum Essen haha 😀

Danach hamma uns dann no mit 2 deitsche Au Pairs bam Starbucks troffen und hoben Kaffee und Kakao trunken bis halb 10 und dann samma eh alle heimgfahrn. 🙂 I war dann kurz nach 10 daheim und dann bin i eh schlafen gangan. 😀

25. März 2014

8:00 Tagwache! 😀 Die Sid war eh scho weg und da Todd is dann auch glei gfahrn als i runter komman bin. Er hat davor Gott sei Dank no die Hühner rauslassen. De Viecha zipfen mi vielleicht aun he. 😉 Die Sid hot gestern erzählt, dass ans von irgendwos gessn gwordn is also homma jetzt nur mehr 6! 😀

I hab zum Frühstück an Bagel gessen mit Philadelphia und donn homma uns fertig gmocht und die Zoe hot wieda ihre Tanzsachen anzogn, wal heite wieder tanzen war. 🙂 Nachn tanzen samma dann einkaufen gfahrn, wal i gestern ka Zeit mehr kobt hob auf die restlichen Rezepete von da Woche zum Schaun, wal i sonst zu spät in da Schule gwesen wär. 😉 Deswegen hab i dann heite glei alles für die restliche Woche einkauft, also eigentlich eh nur mehr für Donnerstag, wal am Freitag flieg i ja nach LAS VEGAS!! 😀 😀

Tanken war i dann a no, wal i morgen wieder zur Alex runter fahr. 🙂 Daheim hamma dann wieder a bissal was gfuttert und um dreiviertl 1 samma zur Bücherei gfahrn und warn dort wieder 3. Dort hom eh olle wieder gredet, dass as jetzt Ende der Woche a endlich ba uns worm wird also um die 10 Grad. 🙂

I hab dann da Zoe ihre Wäsche gwaschen und dann eh glei wieder alles verräumt mit ihr zamman und hab meine endlich mal abgnomman und eigentlich wollt i de dann a bügeln gehen awa dann hats mi net gschert und i habs auf Donnerstag verschoben. 😉

I hab mi dann eh mit da Zoe beschäftigt bis i angfangan hab zum Kochen. Heite hab i so Lauchnudeln kochen miasn und zerst hob i ma schu gedocht, dass des sicha net guad schmecken wird awa im Endefekt wars echt lecker und dann hab i ma glei no a Portion kult. 😀

Nachn Essen hab i dann a bissal ferngschaut und dann war i eh no duschen und vorm Schlafen gehen hab i mir dann no a Folge von ana Serie angschaut. 🙂 Vom Raoul hör i leider nur was in da Früh, also wenn er aufsteht awa da schlaf i ja dann no und dann erst wieder am Abend bevor er schlafen geht, wal er da ja in ganzen Tag mit seinen Team unterwegs is.

So gegen 11 bin i dann schlafen gangan, wal i morgen ja frei hab awa i hab net einschlafen kennan und war dann Ewigkeiten wach! 😦

24. März 2014

Hab heute den Vormittag über wieder frei kabt, wal die Zoe bis halb 12 in da Schule war und Montags bringt da Todd ja immer die Zoe in die Schule und deswegen hab i dann wieder ausschlafen kennan. 😀 Kurz nach 9 bin i dann awa eh aufgwacht und dann hab i mir wieder DSDS angschaut und nebenbei gfrühstückt. 🙂

Dann hab i eh die Zoe abholn müssen und wir san dann danach einkaufen gfahrn und daheim hamma dann erstmal Mittaggessen und alles verräumt. Um halb 2 herum hab i dann mit da Naomi geskyped und wir hätten stundenlang weiter tratschen kennan awa nach ana Stunde hab i dann eh aufkert und sie kommt mi ja eh im April besuchen. 🙂 Bei ihr hats die ganze Zeit um die 30 Grad und sie is im Garten gsessn mit kurzer Hose und Trägerleibal. ;D

I bin dann mit da Zoe ausi spaziern gangan, wal in ganzen Nachmittag im Haus umadum zu hocken hab i a ka Lust. 😉 Wir san dann eh wieda a Stunde spaziert und dann als wir daheim waren hamma uns mal kurz ausgerastet und dann hab i angfangan die Küche aufzuräumen und es Abendessen zu kochen. Da Zoe hab i dann an Snack gmacht und danach hamma dann eh no a bissal gspielt bis die Sid heimkomman is um halb 6. 🙂

Wir haben dann zamman Abendgessen, also i hab Spinatleibchen kocht nach Zoe’s Wunsch und dann hab i mi eh in mei Bett kaut und wieda im Internet gsüchtelt. I wollt mir dann eigentlich am Laptop wieder irgendwas anschaun awa es Internet war wieda mal so langsam, dass as nix gladet kabt hat.

Heute bin i übrigens 4 Monate mitn Raoul zamman und er hat heite sein ersten Arbeitstag bam Roten Kreuz als Promoter und jetzt er den ganzen Tag über ka Internet, wal er kan Vertrag hat und is grad echt a bissal scheiße!

Naja i bin dann um 10 scho schlafen gangan, wal i voll miad war. 🙂